ვახტანგ მაისაია, რომელიც 2004-2008 წლებში ნატოსთან საქართველოს დიპლომატიურ მისიაში მსახურობდა მრჩევლად, რუსეთის სასარგებლოდ შპიონაჟის ბრალდებით დააპატიმრეს, განაცხადეს ხელისუფლების წარმომადგენლებმა 6 მაისს.

შინაგან საქმეთა სამინისტრომ განაცხადა 6 მაისს გავრცელებულ განცხადებაში, რომ  მაიასაია ამზადებდა და დაშიფრული სახით, ელექტრონული ფოსტით უგზავნიდა სხვადასხვა ინფორმაციებს, რომელთა ”ნაწილი შეიცავდა სახელწიფო საიდუმლოებას, მათ შორის საქართველოში არსებული სამხედრო, პოლიტიკური და ეკონომიკური ვითარებისა და სამთავრობო ცვლილებების შესახებ, ასევე საქართველოს მიერ შეძენილი შეიარაღებისა და საბრძოლო ტექნიკის შესახებ”.

პოლიტიკურ მეცნიერებათა დოქტორი ვახტანგ მაიასაია წარსულში საქართველოს საგარეო საქმეთა სამინისტროში და თავდაცვის სამინისტროში მუშაობდა.

”2008 წლის აგვისტოში, საქართველო-რუსეთის ომის პერიოდში საათობრივად აწვდიდა ინფორმაციას საქართველოს შეიარაღებული ძალების დანაყოფების, სამხედრო ტექნიკის რაოდენობის და დისლოკაციის ადგილების შესახებ. მიწოდებული ინფორმაციების სანაცვლოდ, მაიასაიასათვის ხდებოდა ფულადი თანხების ჩარიცხვა მის ანგარიშზე,” - ნათქვამია შსს-ს განცხადებაში.

პრეზიდენტმა სააკაშვილმა განაცხადა დღეს სამხედრო მაღალჩინოსნებთან შეხვედრაზე, რომ მაიასაიამ უზარმაზარი ზიანი მიაყენა ქვეყნის უსაფრთხოებას.

”აგვისტოს ომის დროს ყოველ ორ საათში, თუ საათნახევარში ერთხელ ის გადასცემდა მოწინააღმდეგეს საქართველოს ჯარის პოზიციებს, რათა მოწინააღმდეგეს ეპოვა ჩვენი ნაწილები და უკეთესად დაებომბა,” - განაცხადა სააკაშვილმა.